العلم هو القوة

السعودية يا جماعة دى حكاية و موال الصبر و الله .. يا ريت المشكلة على قد الشغل فيها .. دى بتدخل فى شئون مصر الداخلية و بتزرع فيها الفتن من زمان .. من ايام الوحدة بين مصر و سوريا و حرب اليمن ... السعودية بالخصوص كده و بصراحة متغاظة من المصريين جدا و متعقدة من ايام المحمل و الكسوة الشريفة اللى بتتعمل فى مصر و القمح اللى بتورده مصر للحجاز و الا يموت من الجوع .. بعيد عنك الحقد وحش .. الموضوع تصفية حسابات تاريخية قديمة من ايام ابراهيم باشا و اسقاط الدولة السعودية الاولى ... و من السبعينات و بعد استخدام سلاح البترول اللى ما فادش و لا حاجة .. تضاعف سعر البترول تلات اضعاف و كسبت السعودية مبالغ ضخمة جدا بالمليارات ... استخدمتها فى ايه يا ترى ... فى نشر المذهب الوهابى بتاعها فى مصر و العالم العربى و شراء ذمم الصحفيين و شراء حاجات كتير و ناس كتير .. الفلوس تصنع المعجزات.. و تخللى الاحبة و الانصار كتير جدا .. دا غير زرع الفتن فى العالم العربى و الاسلامى ... و محاولات فرض الهيمنة السعودية الوهابية ع المنطقة و الوطن العربى ... و الشتيمة فى حزب الله اللى واقف لوحده دلوقتى ضد اسرائيل ... فنادق كاملة دلوقتى فى مصر ملك الوليد بن طلال .. و المدن الجديدة و المريوطية كلها فلل و قصور للخليجيين البهوات فى مصر ...و ناس بتسبح بحمدهم و متقبلش عليهم الهوا الطاير ... حتى المنتديات دلوقتى مفاتيحها فى إيديهم  ...

انا اعرف ناس رجعوا م السعودية مليانين امراض : خصوصا الضغط العالى و السكر .. من شدة التعذيب و الضغط النفسى اللى بيعملوه للمصريين

تصوروا الوهابيين دول لو تولوا الحكم فى مصر هيعملوا فينا ايه ... هيهدوا جميع الجوامع المبنية على مقامات .. و هيهدوا مساجد ال البيت : السيدة زينب و الحسين و السيدة عائشة و السيدة نفيسة بحجة انها مشاهد شيعية زى ما هدوا غرف النبى و جميع اثار مكة المكرمة ... و هيكسروا جميع المعابد و التماثيل الفرعونية و يدمروا كل المتاحف و ينزعوا جميع التماثيل من الميادين ... و هيحرموا الاحتفال بعيد ميلاد الواحد و عيد الجواز و الاعياد الوطنية و المواسم الاسلامية .. دول لهم فتاوى لها العجب .. حتى المتصوفة ما سلموش منهم مش عارفين يكفروا مين و لا مين ... بيكفروا الحلاج و ابن عطاء الله السكندرى و محيى الدين بن عربى ... هيحرموا الاغانى و حتى العاب التسالى : الكوتشينة و الدومينو و الشطرنج بيعتبروها اصنام و ازلام ... معلش يمكن اكون خرجت عن الموضوع حبتين بس حبيت اقول رأيى .. و يمكن كتير من المصريين ميعرفوش الحقايق دى عن السعودية و بيكونوا من اشد المدافعين عنها .. لكن هأسألكم سؤال : عمركم شوفتو دولة تتسمى باسم عيلة ؟؟؟؟ بدل ما يبقى اسمها الحجاز و نجد .. يبقى اسمها منسوب لعيلة بعينها و يقولك العصبية القبلية و مش عارف إيه 

Wapher | del.icio.us